Lia fuan badak kona ba Gabineti Inspesaun Geral,
Historia ami nia moris komesa iha fulan Juilu tinan 2000 iha tempu UNTAET nian iha Timor-Leste. Halo tiha Restaurasaun Independencia iha fulan Maiu 2002, GIG halo parte iha istrutura organika Gabineti Primeiru Ministru nian. Harí GIG atu fo garantia katak administrasaun publika hala'o serbisu ho eficiencia no efikasia hó mos iha transparencia no responsabilidade.
Objetivu website ida ne'e atu fo sai informasaun kona ba GIG, ninia funsaun no atividade. Kona ba sa-ida mak ami nia misaun, mandatu, no historia. Informasaun kona ba ami nia serbisu, relatoriu, publikasaun no funcionariu bele hetan iha fatin ida-idak nebe iha ona. Iha mos seksaun ida kona ba buat sira nebe bain-bain ema husu beibeik.
Iha oportunidade ida ne'e hau hakarak hato'o obrigadu ba Banku Mundial, CIDA (ba nia ajuda atu desenvolve capacidade funsionariu sira nian liu hosi projetu especial UNDP mak administra), USAID (ba nia apoiu atu hodi organisa kampanha anti korupsaun iha distritu sira), governu Portugal, Australia, Koreia, Malásia, Nova Zelandia hó Brasil (ba apoiu financeiru nebe fo atu halo visita ofisial ba nasaun sira ne'e) hó mos ba instituisaun sira hotu nebe direta ka indiretamente fo ajuda ba ami nia atividade sira.
Ikus mai hó ksolok boot tebes maka ami fo sai katak GIG iha ona ligasaun ho World Wide Web. Ami hein katak website ida ne'e bele halo ema hatene diak liu no hametin tan koperasaun ho GIG atu fo garantia ba transparencia no gestaun nebe diak iha governu Republika Demokratika Timor-Leste nia laran.
Ami hato'o ami nia saudasoens ba ema hotu-hotu, hodi hakarak, liu housi sistema informatiku ida ne'e, bele serbi diak liu nasaun Timor-Leste nia interese hó mos ema timor oan sira hotu ninian. |
